2013年9月10日
在金龍酒店住宿, 不包早餐, 對我來說正好.因早餐不好吃,不吃又吾底, 食飽咗又食吾到自己心愛的食物,所以睡個懶覺,十點鐘左右去樓下和老虎比拼, 然後步行往總統酒店食個BRUNCH再懷舊.
由金龍酒店沿新口岸步行往總統酒店大約20分鐘, 途經法老王,個噴水池幾靚, 拍照可也.
到了總統酒店,未入門先拍個影片, 比較一下今昔.
去總統酒店食非洲雞是我此行的重點懷舊項目. 因為當年被困, 這裏就是我的避難所. 好難才在酒店買得非洲雞充飢. 看, 現在食同一個菜色, 環境好好多.
這個葡國青菜湯, 滾熱辣,好好味.
若說我昨晚吃樟茶鴨是在天堂, 今天吃非洲雞便落了地獄, 而且是18層果隻. 非洲雞從來我只知道有乾濕之分, 是一款香辣菜式,至於用芝士焗真的聞所未聞. 各位如果你吾怕等得耐, 同頂得順D又臭又蘇的芝士, 不防來總統酒店試試, 想不到總統酒店在這三十年後又一次給我一個畢生難忘的經歷. 其實點解要在雞肶上加成吋厚的芝士, 原因只有一個, 就是令這隻形似雞肶的物體看起來大塊小小. 服務員話係半隻雞的份量, BULLSHIT. 75元一塊雞骨, 都咪話吾過份. 因為芝士實在太臭, 只好把它完數鏟走, 餘下皮包骨看似雞肶的物體, 跟本無處落刀, 只有用手吃, 不過無論如何努力, 都只係食到骨頭, 至於雞肉嗎, 約莫都有10克.
雖然我是來懷舊, 對價錢不甚計較,但75元吃幾塊凍冰冰軟淋淋淡而無味的白涻薯菜, 被人賺去73元純利, 都咪話吾激氣. 所以我食完出來影相個樣都重嬲嬲哋.
話說我這張相站立的地方, 在30年前是海. 10號風球之下,我從酒店房間看見翻起滔天巨浪的所在, 所以酒店的大堂其實是嚴重水浸的.回想起來,我是在1983年9月8日星期四如常到澳門上班, 下午四點幾掛了8號風球無法回家, 所以趕到最近碼頭的總統酒店暫避. 按香港天文台紀錄, 是9月9日零晨掛9號風球, 一小時後再掛10號風球,9月9號傍晚時份才落波, 依稀記得我是星期六早上先返公司打電話向呀媽報平安, 然後搭船回家的, 計起來我應該在澳門被困了兩個晚上. 而令我受困的, 巨風愛倫也.
話說愛倫是戰後三個最強颱風之一, 其餘兩個是62年的温黛和71年的露絲. 說也奇怪, 愛倫之後16年都沒有掛過10號風球.
懷舊完畢, 去看看澳門回歸賀禮展, 其實我在10年前已看過一次, 只因接近金沙, 所以來這裏走走. 看看這件禮物, 不講而之, 一定是上海送的.
因為花了117元的午餐吃不飽, 攪到我要回金龍酒店high tea, 不過蝦多士欠奉, 豬扖包亦吾錯, 大大個, 熱辣辣, 面包脆卜卜, 40元的豬扖包比起75元的非洲雞骨, 貨真價實得多.
五隻獅子, 成群花豹, 成班美女
懷舊點解會講起這些東西來. 其實都是此行在賭場的成績.
因為已經接近輸清光, 所以下最低的注 0.05元, 只限一行, 根本贏的機會微乎其微, 但竟然在這一行裏出現了5隻獅子, 派1000個CREDIT, 是全機最高派采, 雖然只值50元, 但果5隻獅子真係好可愛.
在金龍TEA完之後還有少許時間, 上船之前作最後衝刺, 竟然被我贏番吾少. 如果吾係趕住搭船, 或者可以番本. 金龍有架新機叫做暗影黑豹,我好鍾意玩, 試過全頁都係花豹, (當然中間有幾個洞), 但係都派咗1300幾個, 如果全頁都係黑豹的話, 可能重利害. 又有一次全頁都係美女, (雖然中間有一兩個洞), 派咗3000幾個, 响晒機, 全場引來不少艷羨目光. 可惜埋數仍然輸了差不多200元.
我時時都話, 我吾介意交娛樂費, 但我想有得玩. 此行雖然輸了錢, 但我真的玩得好過癮.
是日也, 2013年9月10日星期二, 我是專程請假到澳門懷舊的.
No comments:
Post a Comment